醫學誌．一次照大腸鏡的經歷

照大腸鏡的心路歷程～

圖片來源：Wikipedia

廿六歲照大腸鏡就好似中學生做社會人士做既事咁，一般照腸鏡都係50歲以上人士先會做，我足足後生一倍，不過因為最近身體出左少少問題，在醫生建議下，上個月就做左腸鏡和胃鏡啦！


應承左至睇到張事前準備清單真係有少少後悔咁爽口話做大腸鏡，因為好鬼麻煩（不過最麻煩其實係保險，搞左我勁耐），唔係就咁去照就得，而係要三日前就要做好多準備，當中包括飲食控制、灌腸清腸胃。

以下係我順時序經歷呢三日準備照腸鏡的心路歷程：

18/10 開始控制飲食

• 正式開始「低渣飲食」（台灣係咁叫），個名好好笑，香港叫「低纖維飲食」，即係唔食高纖維的食物，例如菜呀糙米呀都唔食得。
• 原來唔食菜，會覺得好唔飽肚。
• Lunch食左海南雞飯，纖維來講應該接近零，脂肪來講就爆標啦。lol
• 平時下午tea time我都會食個細蘋果，呢日就唔食得。
• 唔食菜又唔想食咁多肉，只好食白飯和魚，飽肚感不足。
• 唔飽會瞓得唔好。

19/10 晚上要開始飲瀉水

• Oh shit，大姨媽到！
• 診所打電話來confirm booking個時，就問月經到照唔照到大腸鏡？姑娘問左醫生話Okay，亦無咩要特別處理。
• 不過我都係決定試下用棉條，無咁核突。（好似係）
• 中午食完午飯之後就只可以食流質野，仲要係CLEAR fluid diet，即係粥都唔食得，只可以飲湯、隔左渣的果汁。
• 我的「飢饉三十」開始啦。
• 肚餓和M到真係雙重打擊。
• 去鴻福堂買左兩包湯飲，呀呀呀無飯落肚好餓呀。
• 鴻福堂啲湯好方便，熱定比你仲有個杯。
• 返到屋企飲完湯就準備飲瀉水啦，要準備隨時去廁所。
• 診所係開Klean-Prep粉劑俾我，據說粉劑最好飲，另有更難飲的濃縮支劑。
• 一小時飲一公升，一共要飲三公升。
• 其實一飲飲咁多，都係會變成好難飲，好難飲，好難飲。
• 係好膩的奶粉混鐵腥味。
• （粗口粗口粗口）真係好難飲。
• 沖左2公升，飲左1公升都仲未開始急。
• 個肚飲到好脹好飽，啲水再飲未到胃就想湧返上黎。
• 真係忍唔住噴左少少出黎。
• 飲左1.5公升，終於有急住去廁所的感覺。
• 山洪暴發。
• 之後，每隔10幾分鐘就去一次廁所，有時係一行出廁所門口就想返入去。
• 真係好似廣告話個啲道友咁，「每十分鐘去一次廁所」，大家千祈唔好吸毒呀！！每十分鐘去一次廁所，好慘架！
• 痾到咩都痾唔出，淨係得水，終於可以收工。
• 建議真係盡量痾清，連水都痾清，先好瞓，我瞓瞓下個肚啲水咕咕聲，又係要起返身去廁所真係好麻煩。

坊間有好多減肥保健產品話自己點點點清宿便可以減到肥，究竟「清宿便」清到如照腸鏡要咁乾淨的程度有無幫你減到磅？我飲瀉水前到第二朝去到診所磅重，係輕左0.1kg咁多，多謝晒。


20/10 照鏡日

• 呢日我請左假唔使返工。
• 我個booking係10點，9點半要到診所。早啲好，早啲搞掂早啲可以食返野。
• 7點起身要灌腸，要吱一支灌腸劑水入屁股洗腸，來個終極一痾。
• 之後就再無野落肚，包括飲水都唔得。
• 係屋企梳化瞓多幾個字就出發去診所啦。
• 係呢個時候，我覺得個人有少少脫水。
• 好想飲水。
• 好想食早餐。
• 返來到中環，診所就係中環娛樂行，超級方便。
• 然後姑娘講解下流程和安排換衫。
• 正式開始！！好緊張！人生第一次入手術室！瞓係張床度軟林林冷氣岩岩好好舒服，等緊醫生來開始！
• 醫生來到，姑娘係我個口度打藥準備做胃鏡，再幫我打麻醉，醫生同我講會有少少暈，然後…無然後啦。
• 因為我瞓著左，瞓到不醒人事。
• 到我有知覺個時，就剛剛做完檢查準備推我出返去啦，而我仍然係好眼瞓，個人完全郁唔到，淨係約莫聽到醫生講我一定好累啦。
• 我繼續係診所瞓，瞓左足足成個鐘，我先醒，再慢慢想起身。
• 等左一陣拎報告等醫生填埋保險claim form，再約埋時間follow up consultation就走啦。
• 返去屋企附近食粥。

就係咁，我完成左照胃鏡加大腸鏡啦。照完之後都無咩唔舒服，一切如常。今日做埋最後覆診，安心晒。

利申，公司和自己買的醫保各自cover大部分。 我問過診所，如果唔係醫保包，要俾幾錢？姑娘報左個價－ 胃鏡加腸鏡係HKD$16,000-20,000。結論：一份好的醫療保好重要，完。

重點：如果你有任何醫療上的疑問，唔確定自己有無需要照大腸鏡，或者點樣跟指示做準備（間間都唔同），請諮詢醫生尋求專業意見。