 |
| Swiss LX138 |
Swiss － LX138 －A340-300 －ZRH-HKG－ Economy
這程LX138機屬於second leg，前段是由阿姆斯特丹飛去蘇黎世的LX735。回程這一天是清明節假期完前日，當天早上才醒起要做online check-in的時候已經排到44AB，即係整架飛機2座位排的最後一行，A340主要係2-4-2格局，而最後4排則是2-3-2格局，最後我揀了43DE，坐中間的3座位，想前啲都無，班機好爆。
當日正要由阿姆斯特丹的中央火車站前往到史基浦機場時，買完火車票上到月台先發生火車停駛事件，由於路軌有事故（？！），所以所有去機場的火車服務都暫停，唔知幾時會恢復？！我好驚慌！！！第一個念頭閃過「係咪恐襲？」（好彩唔係！），另外當時已經係下午5點幾，班機晚上8點起飛，坐到火車去只要20分鐘車程當然時間充裕，但中央火車站真係得火車會直達機場，無巴士到，要搭巴士要先搭電車去某個站再轉，要幾耐時間，我完全無概念。
結果我問當地人都話只可以搭的士，車錢大約€50，無計，唯有試下撈下有無一齊搭車夾車錢，本來搵到兩個外國女人part，但可惜個個都去截的士，去到的士站佢地去左part另一架得返2個位的7人的士。Anyway，最後有成功截到的士已經好好，€50就€50啦！
之前在慕尼黑，呀媽曾經講笑咁話火車巴士電車纜車各樣交通工具都試過了，爭的士咋！我話，如果我們要搭的士，咁情況應該好危急。點知，真係開口中。
呢架benz的士用了大約半小時將我們送到機場，期間有小塞車，據說其他火車站到機場的火車都停了，所以多了車出馬路，埋單€53，希望保險claim得返。
 |
| 睇住個錶係咁跳，好緊張 |
過了安檢入去禁區，距離登機時間不夠一小時，我和媽媽好快去買支水兩個包，就去找閘口。都步行了一段時間先到，然後食包。
 |
| 麵包都係好硬 Life is already hard，點解連個包都要咁硬？！ |
飛機遲來，延誤了半個鐘，但我下班connecting flight （無錯，就係要評的個班機，我仲未寫到！）transit時間只有一個小時。
唔通我有機會被delay到接不到下一班機而有可能claim到EU regulations入面的delay賠償？
太．天．真．了！
一上到機機師就放話要追返啲時間，最後只遲了15分鐘到蘇黎世。
 |
| 遲到的LX735 （A320） |
15分鐘，is all we need。由落機搭無人駕駛列車過關蓋印再到閘口，只用了15分鐘。去到剛剛開始登機，還有時間去個洗手間。
 |
| 登機ing... |
 |
| 無飛機正面相，將就下~ |
 |
| the seat |
根據Seatguru，座位間距32吋，闊17.3吋，比漢莎A380窄了一吋。
我咁細粒，都覺得有點窄，手臂唔知點放好。
到派餐時間，忘記了影晚餐，我選了蜜糖香草雞肉配燒汁配燉飯西蘭花，正常無乜特別。另一選擇為意式薯球佐酸豆橄欖醬加菠菜，vegetarian。仲有派瑞士朱古力。
 |
| 早餐 － 蘆荀炒蛋加瑞士薯餅 我中意食蘆荀我中意食炒蛋我中意食薯餅，所以我覺得好食 |
 |
| 嘩我幾耐無用過用遙控的娛樂系統 |
係全程飛行期間，尤其是派餐時，我留意到班crew服務態度好好，仲係有sense of humor個種，係呢度講唔到咩例子，用一個字形容就係 "cheerful"，令人感覺好舒服。
 |
| 又估你唔到佢有齊全套James Bond |
我係一個好懶瞓的人，但都瞓唔著。點解呢？呢個電視螢幕係全架機我最失望的地方，因為個mon是熄唔到的！尤其我面前呢個唔知點解較到最暗都仲係比其他mon光好多，比個mon「殘」到瞓唔著，好嬲，嬲到去廁所拿擦手紙遮光，又唔遮得幾多。
note to myself: 一定要準備眼罩！
 |
| 機艙 |
好不容易，pat pat就黎爛之際，終於進入香港空域啦，又遇上氣流，拋下拋下，有離心力架！我有啲緊張捉實扶手，架機大約拋左5分鐘，終於land到個時，大家都係度拍晒手。Finally, home!
有乜感想？由於呢程係瑞航，比起來回都搭漢莎，張機票貴了幾百蚊，我覺得有啲唔抵。雖然服務一流，但坐得唔舒服就係唔舒服！
會唔會再搭？換其他機種、價錢岩就會考慮。以我所知瑞航飛HKG-ZRH還有777，或者會好啲？
瑞士航空 Swiss：www.swiss.com
延伸閱讀：
2019年東歐（德國、奧地利、克羅地亞）蜜月之旅．行程概覽2016 德荷行程：
〔德國．荷蘭〕歐洲12日春遊2016．行程概覽
復活清明遊德荷．準備篇．歐遊小記2016
其他飛行報告：
〔飛行報告〕英國航空 BA32 香港往倫敦 A380 搭乘分享
〔飛行報告〕國泰航空 CX524/505 香港往來東京 搭乘分享
〔飛行報告〕漢莎航空 LH797 香港往法蘭克福 A380
沒有留言:
張貼留言