健身誌．康文署器械健體訓練班

上左康文署的「器械健體訓練班」兩個星期，即係已經上左一半，想係度分享下報名和上堂的經驗。

康文署健身室（圖片來源：康文署網站）

在七月頭報班之時，正值California fitness申請清盤，好多新聞報導講返康文署的健身室好抵玩，應該會引左不少人蜂擁報名，好彩我都報到八月的班。

不過我報康文署gym班呢就唔關「加州大地震」事既，我從來都無做過gym亦覺得每個月俾幾百蚊做運動唔係好抵，但係因為呢排減肥又驚落雨想多個地方做運動先決定報，唔想join 私營個啲好怕人sell野煩住晒。

首先，講下如何報名報讀康文署的「器械健體訓練班」先。

就咁既，「器械健體訓練班」的名額係先到先得。

在康文署網站查定想報既班，去就近的體育館拎定報名表填好晒資料，在開始報名第一日早上8點半前，記住係「前」，in case人多要排隊，帶埋身份證親身去到報名處等報名，時間一到就遞表交錢，職員會俾返張飛仔你，就搞掂架啦。

康文署網站：www.lcsd.gov.hk

如果係第一次報名，應該唔難既，因為有優先報名權，但都要留意一班得25個名額，滿左就可能要等下一期啦。而已經上過既就要等開始報名後第二日先可以再報剩低的名額。

想淨係用健身室又唔想上一個月堂呢，可以報「正確使用健身室設施簡介會」並要通過測試啦 — 抽一日上個兩三小時的班，做份測驗卷答幾條問題，合格就得啦，應該唔難既我估（我都無上過），前提係要報到名，據說抽籤難中過六合彩。

咁我報左邊班？

我就報左星期一三五 早上7點的班，在離屋企最近的體育館上堂，一共12堂，上夠10堂就夠pass，做完運動沖個涼就返工。睇研究話早上做運動可以早啲kick start 新陳代謝，接下來一整日都可以保持比較高的新陳代謝率，燒脂會快啲。至於咁早起唔起到身，係講意志架姐。岩岩開始個時我都覺得幾辛苦，不過，有決心，就起到。

咁有無用先？

Well, 係視乎你班個教練好唔好既⋯⋯基本上，一開波教練會教下新同學（即係我，其他同學都已經來慣來熟）使用器械的正確姿勢，講解下點樣做、做幾多就夠咁樣，之後就自動波，教練係旁邊睇住有時會指點下姿勢咁。做幾多、做幾耐，都係自己決定。

聽講話啲機質素好參差啵。

咁應該無私營個啲Pure/Physical/Cali咁先進咁乾淨架啦（無入過去，淨係街外望過），不過康文署的都係正正常常，乾淨企理，用得到囉～某啲新啲既體育館仲再靚啲架，加上依家實行配額制控制人流，時票HKD$14一個鐘任玩，月票都係HKD$180，What else can you ask for?

之後仲使唔使繼續keep住報班上堂呀？

如果你會固定時間地點定時定候去做Gym，又俾你咁勁再次報到名啵，報班都係HKD$75，確係比買月票還要抵！但如果prefer 彈性時間想去就去既、又想去下其他康文署gym，月票就岩用啲。


正在努力做運動減肥，希望兩三個月後寫多篇減肥誌，分享下心得啦，成功的話…哈哈哈，會成功既！俾啲信心自己！Hush！