10 things you should buy in Bangkok, well, and where to find them
 |
| 翟道翟市場 |
1. 香薰
唔知係咪因為當地的旅遊文化的關係，又按摩又spa，在demand and supply的情況下，泰國出產好多香薰，唔止多，仲要好，質素好，價錢都好。比起香港細細支收你三四百蚊，曼谷大大支就二百蚊港紙有交易，我每次去都買幾支。
出名的牌子有Thann、Harnn、Bath & Bloom、KarmaKamet等等，在各大商場內會搵到，例如CentralWorld。我就簡單啲唔係好睇牌子，遇到岩心水的味道就會買，我的最愛味道係雞蛋花，不過好難搵到，只好揀類近的味道。
 |
| 不知名牌子的香薰 |
呢支靚靚Thai Flower味的香薰（760泰銖，好似係）在翟道翟市場內的一間「黑店」買既，「黑店」唔係話佢劏游客，而係佢裝修到整間鋪頭都係黑色，淨係點著蠟燭，幾有格調架。
尤其推介在翟道翟市場內的一些香薰小店，100泰銖可以買三四支細細支（大約10-15ml）連一朵花造型的擴香竹，做手信小禮物或放自己屋企廁所亦是佳品。嫌10-15ml太細，仲有100ml、幾百ml可以揀，粗用一流。
 |
| 我大中細都買齊，放屋企不同位置 |
2. 手工皂
泰國手信店的潮流真係年年有新野，回想當年（我十年前第一次去曼谷）最興係買一pack十個散紙包做手信派派派，到今時今日2016年的曼谷手信代表我諗無人會否認手工皂一定係其中之一，因為真係好。多。好。多。地方都有賣，在Asiatique和翟道翟市場可以揾到。
不過香蕉、山竹、芒果造型個啲實在太多太濫，我的推介係「Madame HENG手工皂」，造型係一舊鹼，還原基本步，最basic個隻草本配方話說可以減少濕疹改善皮膚，在Big C可以搵到，或者係Terminal 21底層亦有專門店，有更多其他配方選擇，大約30-40泰銖一舊。我現在就正是用緊呢個鹼，係幾好用既，好多好綿的泡泡，不過有薄荷腦所以有點涼，夏天再岩用啲。
 |
| 專門店仲有一pack三件禮品裝，送禮佳品 |
正常包裝係一個女人（即係呀Madame Heng）個頭係中間。
 |
| 位於Terminal 21的Madame Heng專門店，店號LG031 |
另外亦可以發掘下其他小店，我在翟道翟就搵到一間賣用Jasmine rice造的手工皂，無錯，係用米，泰國茉莉香米，我就揀左有唔同味的包裝，120泰銖六舊，好抵好抵。
 |
| 米味最特別 |
3. 藥膏
在Big C藥品部，所有最好賣的藥物都會擺晒出埋，睇返自己和親友需要，慢慢揀。Asiatique都有些店舖有賣，不過藥呢都係在大公司買好啲。
 |
| Big C藥品部 |
一般最多人買既有一pack pack的青草膏、萬金油呀，仲有Counterpain痠痛藥膏就主要醫肌肉痠痛和關節炎，不過我前幾次買過又送過，加上屋企有其他類似的藥品，結論都係唔係好實際（對我來講），最後都係無買呢啲，淨係買左支虎標牌按摩藥膏和蝸牛除疤膏。
通常會一串串咁買的薄荷棒都好好用，得閒索一索舒筋活絡，聞一聞醒腦提神，之前返工趕稿都係用佢吊命。不過如果你容易頭痛，建議你用KarmaKamet（其他brand都得既）的香茅精油按摩下太陽穴，放鬆下個人。
 |
| 中間右邊就係一串串的薄荷棒 |
4. 美白類護膚品
如果話蔡瀾對食有一份執著，個種執著同時可以適用於泰國人對皮膚要白的追求。你睇下曼谷市面上的平面廣告個個都白雪雪，同埋路上唔少泰國人真係好白，就知泰國的美白產品應該好work。Snail White的美白面霜好熱賣，我買左盒（見下圖中間），不過未開始試，試左再報告。
 |
| 泰國美白產品 |
另外我亦買左Milk Plus Whitening Body Lotion 牛奶潤膚露（圖右），我主要搽腳，真係有白左，香港冬天用唔太夠潤，夏天用岩岩好。同時，開左Milk Plus 美白磨砂膏（圖左）來用，我塊面係有白左滑左，係咪因為呢盒野就唔清楚啦，不過偶爾去下死皮去下角質亦是好事。
5. 竹/木製廚具
筷子、木鏟、托盤，杯杯碟碟之類，又實用又有泰國特色。
 |
| 翟道翟市場內某店 |
 |
| 翟道翟市場內某店 |
6. 零食
無既，你總要派手信比親友同事架嘛，Big C隨手一拎一大堆，輕鬆解決買咩好做手信的難題。在云云零食海之中，好食既有好多，但係我在此只推介一款 — 冬蔭功味的百力滋。我自己一個都可以KO 一Pack十包呢隻百力滋，好食到唔捨得拎出黎做手信。拿，係辣架。
 |
| 唔記得影獨照，就在大合照標返零食出黎 |
7. Naraya 曼谷包
 |
| 個大袋收埋左，就show下其他我有的naraya袋仔，幾實用 |
歷久不衰的曼谷icon - Naraya包包。買個大袋，搭飛機個時做handcarry手袋最perfect，污糟左都唔心痛。其他配件，如拖鞋、眼鏡套、散紙包、化妝袋等等，亦是實用之選。
8. 爽身粉
 |
| 好出名大大罐的蛇牌爽身粉 |
我就無買蛇牌，就反而買左Pond's的防曬BB粉，唔小心買錯左粉紅色，不過都可以照用，等個人無咁「笠」。Big C、屈臣氏有售。
 |
| 太心急買錯左粉紅色，本身想買皮膚色 |
9. 驅蚊劑
 |
| 去熱帶地方記得做足防蚊措施 |
正所謂毒物的隔離就係解藥，泰國咁熱咁多蚊就梗係有最好用的防蚊劑，呢隻防蚊劑細細支放手袋岩岩好，我在去水上市場一日遊當日有用到，的確無蚊埋身。屈臣氏、7-11有售。
10. 蜂蜜
 |
| 你見我就黎用晒就知幾實用啦！ |
泰國皇室出品的蜂蜜，好方便的唧唧支裝，沖蜜糖水夠潤，點麵包一流。大約30泰銖一支，7-11有售。
除左以上十款推介，仲有咩好買呢？
有一次我試過買米，無錯，買紅米（食個啲呀唔係大陸小米部紅米），因為香港買好貴，幾十蚊一包一公斤既，曼谷買好平，都係幾十蚊，不過係泰銖，就買左一公斤真空包裝拎返香港食。
仲有傢俬。泰國的傢俬，例如枱燈、門手把、擺設、復古風的家具、木製櫃等等，一般比香港平，還要有特色，等屋企都可以增添一種泰國度假feel。翟道翟有好多家具店，可以安排DHL送貨，不過計埋運費抵唔抵就唔清楚啦。
 |
| 又係翟道翟市場 |
我上一次兩年前在Asiatique睇中左盞二手的Louis Poulsen 紅色PH吊燈，標價3000蚊港紙（原價過萬蚊），好想要，但又仲係覺得貴放棄左，結果今次重回Asiatique時連間店鋪都消失埋，唉。
 |
| 機場入面間Boots的推介 |
唔知你又覺得曼谷有咩最抵買呢？不妨留個言分享下！
延續閱讀：
沒有留言:
張貼留言