〔京都宇治〕對鳳庵茶道體驗．自己抹茶自己抹

去宇治，飲抹茶。在傳統茶室跟老師學習茶道。

どうぞ！

位於宇治川旁的對鳳庵係由政府經營的公營茶室，主力推廣茶道文化，所以茶道體驗的價錢相當相宜，最基本品嚐一杯抹茶／煎茶都係500yen。

去之前參考過幾篇網上文章，發現都係來飲茶的（500yen個隻）居多，無乜有提到自己都可以學抹茶。不過，我地一場來到，山長水遠，又點可以坐15分鐘飲杯茶就算呢？！

所以，我預約的茶道體驗，係「お点前体験」，包括老師沖一杯、自己都學沖一杯，和茶點，盛惠1200yen。

出發前早兩個星期我就打電話去預約當日11點的茶道體驗，去到當日搭JR時唔覺意預到時間好緊，要急步衝過去，直接走到對鳳庵對面的旅遊中心付款買票，職員就再帶我地入到對鳳庵請老師準備。

旅遊中心內有介紹是日茶道流派

由於志在向遊客推廣茶道文化，對鳳庵提供既並不是full set的茶道茶會，而係just a glimpse of 正宗茶道，所以時間都係短短的15-30分鐘。老師來自不同流派輪流來到茶室提供茶道體驗，呢一日我地體驗的係裹千家流。茶點則由丸久小山園提供。

對鳳庵門口

日本傳統房屋

對鳳庵有三間不同大細的房，有係榻榻米有唔係榻榻米，我地上堂的「課室」就係桌椅式茶室，唔使跪坐。入到去室內，坐定定同老師寒暄幾句，就正式開始示範啦。

開始啦開始啦

出力抹出力抹！

當然，老師完全係effortlessly就抹出一杯好茶，用個竹拂掃起勢「發」都面不改容，非常優雅。到後面我地自己來抹先知要幾多efforts。

好岩季節的和菓子

 老師示範的係一杯的份量，我地兩個人，我個杯就係房外另一位老師做的，兩杯抹茶同時送上。老師叫我地食左件和菓子先再飲杯抹茶，中間都無咩叫你轉下個杯個啲（都話旨在體驗下囉唔使咁認真），好舒服咁同老師傾下計（老師識少少英文）又飲下茶，而且和菓子的甜和抹茶的澀味配合得岩岩好，一道不重不輕的甜味在味蕾上徘徊。

不過，我唔記得影低老師杯抹茶。到我意識到個時，已經⋯⋯

我已經飲完鳥～

連個杯都好配合賞楓季節。

到我地啦！！！

老師收走我地飲完的杯碟後，就換上我地的簡易版茶道用具。

由落抹茶粉

到加熱水

到出力抹出力抹！！

老師就企在我地面前逐個step指導我地，到我地「發」抹茶個時，仲笑笑口咁問我地「係咪好累呢？」，因為用手腕發力好似打蛋咁要打到整個茶面都係泡，都真係幾累。

我抹架！！我抹架！！

自己努力抹的抹茶，係特別好飲架！！！仲有配一塊甜餅。

體驗完成！

與非常親切的老師合照！

對鳳庵
地址：宇治塔川2番地
電話：0774-23-3334
網址：宇治市観光センター
開放時間：1月10日至12月20日；10am - 4pm
體驗所需時間：15-30分鐘
Note：部分淨飲茶可以walk-in，要自己都抹茶的茶道體驗就要三日前打電話去預約，可以用英文。

完成左之後就去行左附近啦！宇治呢個地方出名抹茶到一個點，係可以你走在街上都呼吸著帶抹茶味的空氣，真係好厲害。另外，宇治川都好靚呀呀呀！

宇治川

宇治川

平等院表參道

迷失表參道（圖文不符）

平等院

宇治公園

*部分照片由友人Aki拍攝。

Facebook: @浮世志 Ukiyozhi
Instagram: @ukiyozhi
Email: ukiyozhi@gmail.com


延續閱讀：

16．京阪秋色 ：〔京阪行〕七日六夜京都大阪賞楓自由行行程參考
〔飛行報告〕香港快運 UO1844 香港往大阪 A320 搭乘分享
〔京都〕著和服賞紅楓．岡本和服體驗分享＠清水寺總店
〔京都宇治〕漫步平等院

其他精彩旅程：

• 2019年東歐（德國、奧地利、克羅地亞）蜜月之旅．行程概覽
• 〔清邁遊記〕4日3夜慢嘆泰享受之旅．行程概覽
• 〔東京〕新宿御苑．抓緊櫻花的尾巴