浮世志: 〔京都遊記〕著和服賞紅楓．岡本和服體驗分享＠清水寺總店

這次 Girls' trip 京阪之旅重頭戲－著和服！遊京都！

穿和服的我

整個京阪旅程最期待就係一班女孩子一起穿和服遊京都！正值賞楓旺季，我和朋友們早係幾個月前已經上網預約了在清水寺總店的當日最早的9點booking，亦選了最多人揀的「正裝套餐」5,000yen（不含稅），務求揀到最岩心水的和服可以著成日。

岡本和服網站（中文）：www.okamoto-kimono.com

呢一日，終於來啦！（大笑）

我地晨咁早起身化妝搞一大輪，又行錯左陣路，兜兜轉轉走到在五条坂的總店，咁岩過左9點少少，已經有好多人揀緊啦！！！！

地圖－好明顯好多人都會去錯

在五条坂的岡本總店

總店門口

入到去，職員就每人比左一個大購物袋，可以裝可選好的和服和配件。由於忙著揀和服，都無點再影過相。我兩手拎住都係衫，加上換衫地方涉及私隱，以下部分係文字說明啦。

尋尋覓覓，心大心細，最後揀好晒和服、底衫（個領）、腰帶、細珠帶和手袋。

在店內揀好所有野比埋錢之後，職員就帶我地去到店後另一座新建的二層樓房，上到二樓就排住隊等日本嬸嬸幫你換衫，係呢個時候，記得去一去洗手間先！

到換衫個時，嬸嬸會叫你脫衫，你可以保留保暖內衣，不過影相個時要小心唔好突左出黎，最易穿幫的位係後頸。我個時就無著到保暖內衣，係有少少後悔無著，因為個日中午有陰濕雨再加上氣溫轉凍，尤其手腳冷凍都幾難受。

著左底衫著埋對襪之後就過隔離房set 頭，長髮有6款設計選擇。髮型師好快，講緊係10分鐘內，set好你個頭之後，再繼續著衫。經過一輪又綁又紮，好似端午節包糉，嬸嬸最後打個靚結綁埋條銀珠繩就搞掂！

落返一樓等待區等齊人，執好手袋仔，準備出發。如果要加外套披肩，或者毛毛頸巾的話，就係呢個時間揀埋。我地一行五人好明顯係無懼寒風，除左因為外套會遮左套和服唔靚，加外套亦要另加5,000yen，也是太貴。

最後，職員帶我地出門口，著好拖鞋，就來到店旁邊的日式庭園影個相。岡本的職員會為每一位著好和服的客人影張相放上自己公司網站。

著完衫就來到呢個花園

燈燈燈櫈！以下就係我地花了一小時的成果！張相同時在岡本個網站上都可以搵到。

努力的成果－我套和服充滿拜年感

我地一行五人，浩浩蕩蕩，上午去伏見稻荷，下午就返到清水寺，大約4點幾臨天黑前就歸還和服，整日行程非常愉快。

以下係一啲close up。

來到伏見稻荷就諗起《藝妓回憶錄》

難得來一次日本，來一次京都，花一日時間著和服，當然想揀套最靚最好睇，係咪？如何配搭出最合適的和服，的確係一門學問。

除了要著上身覺得靚呢個首要條件（廢話）之外，以下有幾點可以留意下：

配合當時的季節，明明係深秋就穿粉嫩色系或好夏日feel的顏色，會有不倫不類的感覺，即係你唔會夏天穿冬天衫，冬天穿夏天衫架嘛？雖然唔係話唔得既，怪囉～
考慮你想去的地方環境和景點大約係咩背景顏色，例如你計劃著住和服去伏見稻荷的千本鳥居，千祈千祈唔好著橙色的和服（見上圖示範）！睇櫻花其實都唔適合著粉紅色，因為影相會痴底，個人會在照片中變得不太突出。
大概縮窄了color range之後，就係找適合自己膚色和性格的圖案花款啦。同一隻色、唔同的花，可以有好唔同的感覺，配櫻花圖案的就Girly啲、配牡丹芍藥就華麗風、配幾何就有性格啲、配上鸛的就係霸氣！一隻色唔同深淺度都帶來唔同的感覺，淨係紅色都有分大紅、鮮紅、暗紅等等等等啦。

概括而言，深色系比好受歡迎的粉色系其實係更安全，以及在影相時效果亦比較好，對比背景會突出啲，另一極端的偏白色系亦係突出之選。

揀好幾個款不妨問下店內職員的意見，佢地日日睇和服多過你食飯的眼光非常有參考價值。

花了不少時間淨係講件和服面衫，咁點揀腰帶底衫個啲呀？唔使擔心，只要諗好件和服係咩色咩花，一去下一個sections揀配件，就好快搞掂。職員會建議2-3個款，腰帶通常係對比色，或者深幾度的色，唔係會唔見左條腰；底衫個領通常係粉/黃/白色，花紋就要視乎本身和服的圖案，唔會太難揀。最後就係揀手袋，最穩陣之選係細細個的軟布圓形索繩袋，放銀包、護照、手機、紙巾和唇膏。

所以去租和服之前，諗好以上的考慮，到時就唔使花多眼亂花太多時間亂選。

唔清楚有咩選擇，不妨先到岡本和服官網的gallery睇睇其他客人的示範：岡本和服相簿連結。