浮世志: 歐遊後記 2016 之 Random Observations

歐遊2016系列寫到尾聲，來一篇後記重新整理一下我的觀察和感想。前後三次遊歷，到底我去過的歐洲國家留左啲乜有趣的印象俾我呢？

搭redeye機一覺瞓醒就到歐洲（攝於5月出差倫敦時）

回憶返3年前去了英法意19日，今年復活節時再次衝出亞洲到訪德國、荷蘭玩了12日，五月時又去了倫敦出差一星期，前後三次遊歷，對歐洲的認識唔可以話有好多有幾深，相反我好膚淺咁見到有咩覺得有趣就記低係本簿，就有了這篇內容亂糟糟但嘗試懶有組織返少少的後記。

「帶著偏見去旅行」！以下好簡單地將自己小小的好奇心放在「食、住、行」三部分上。

「食」：

德國麵包好硬。
在德國，麵包係主菜，係德國文化的象徹之一。
但係在我食過麵包的幾個地方，德國的麵包應該算得上係最硬，隨手丟出街可能會丟死人。咁點解會咁硬架呢？為此，我特意請教google大神，得出的結論大概係德國當地天氣不利小麥生長，加上文化上未有受到19世紀後期工業革命開始大量生產白麵包的影響，在製作上一直保持住19世紀前的做法，仍然都係用大麥等比較粗糙的全麥製作，所以個包係硬和粗既。

咬到個嘴好累的德國麵包

英法德意荷，generally最多好野食的國家毋庸置疑地應該係法國啦。
如果話德國埋下左好多味蕾地雷，法國就係美食的天堂，由農村菜到fine-dining，由生蠔到甜品，Paul的麵包更加唔使講，必食。而呢幾年英國好似進步左好多，可能味蕾進化左（？！），倫敦多左好多真係好食的餐廳。不過，我唔會再食haggis*，直到永遠，阿們。
*Haggis：羊肚雜碎，一道傳統蘇格蘭菜。

有靚靚運河景的阿姆斯特丹airbnb

「住」：

歐洲酒店好少有提供熱水煲。
呢個真係好重要，尤其我呀媽呢類長者，有杯熱水熱茶暖暖肚，對佢地來講會舒服好多。而對我來講，最重要梗係沖杯麵啦！日日食硬蹦蹦的麵包我會有麵包恐懼症（事實上我已經有呢個病好耐，自從小學到中學日日都係食雞尾包腸仔包做早餐，大學起我再無食過呢兩隻包）。好彩我們有先見之明，早早在出發之前買左個雙電壓旅遊熱水壺，整個歐遊旅程溫暖、愉快。

歐洲人，尤其荷蘭人，真係好高。
曾經睇個報告話荷蘭人平均身高男的184，女的170，全世界最高，我在阿姆斯特丹個時當然唔會去度下人地幾高啦，但舉個例，在阿姆斯特丹的airbnb，掛毛巾個勾係一米九咁高，我掂都掂唔到，而在倫敦的住處，洗手間塊鏡裝到鬼咁高，企在鏡前我淨係睇到半個頭，實在太過份了。（哼）利申：157。

悶到瞓著左的阿姆斯特丹遊船河

「行」：

去廁所要俾錢這回事。
歐洲的洗手間要收費是常識吧？但幾錢先係正常呢？我由最少的€0.2到€1（咁貴你唔好去搶？）都見過，大部分都係€0.5。如果去火車站搭火車，不妨等到上火車先去廁所，免費。去餐廳食飯、行博物館時最好都去下洗手間，費時在街上想去又唔捨得俾錢去。

治安這個問題。
騙子到處都有、小偷四圍都係，係唔淨止係歐洲，歐洲治安好唔好，其實係一個主觀問題。你覺得倫敦治安好，我卻偏偏在Big Ben附近遇過騙子；你以為巴黎治安差？我就覺得羅馬仲要恐怖啲。總之都係一句，小心個人財物，財不露眼，貴重野跟身，去邊度都一樣。

外國人對你講「你好」（普通話）實在係好 random。
試過在羅馬中央火車站有人對住我大叫「你好！」爭啲嚇窒我然後就咁走左去（咁即係算乜意思？），又試過在慕尼黑英國花園飲飲下啤酒俾人整估，連係阿姆斯特丹搭巴士個時個鬼佬司機都對我和媽媽講兩句「你好」「謝謝」。當然有人係friendly有人就not so friendly，take it easy就好。不過，我在倫敦反而無試過有人同我講「你好」，呢一點相當有趣。

外國人真係好鍾意逛公園。
居於倫敦的朋友笑說：「有陽光個個週末你去下公園先會知原來倫敦住左咁多人」！週末的Regent's Park勁熱鬧，慕尼黑的English Garden直頭人頭湧湧齊飲啤酒，回頭諗諗香港人星期六日除左商場逛街還有可以去邊呢？如果香港多啲大型公園（唔係郊野公園呀）會唔會都有咁正的氛圍呢？多幾個好似觀塘海濱咁都好呀！

搭𨋢唔興㩒閂門掣，有啲𨋢直頭無閂門掣。
我出入倫敦個office一星期，留意到大家原來唔興㩒掣架啵，寧願等架𨋢慢慢閂門。點解呢？點解呢？唔趕時間返工咩？我見大家唔㩒我又唔敢㩒，但我又好想㩒粒閂門掣快啲上樓。我明白有啲𨋢無閂門掣是要留時間比行得慢的長者或行動不便的人行入𨋢唔會夾親，但返工邊有呢啲人呀，定係佢地真係好悠閒呢？還是香港人真係心急啲？－心急人上

後記以後

以上都係我小小的文化衝擊（笑），太深入既歷史文化先放下不談，唔係打一萬字都完唔到。文化的不同可以擦出好多有趣火花，亦可能出現衝突和磨擦。作為一個旅客，講到底最重要還是尊重、尊重和尊重吧！

未來一年還會唔會到歐洲玩？看情況吧！雖然寫此文時正值英國公投脫歐，英鎊跌到31年低位，好吸引！（笑）不過，我接下來反而想專注一下亞太及大中華地區呢，目前暫時入手了兩套下半年出發的機票－曼谷和大阪，呢排慢慢開始做下資料搜集，留意下當地有趣景點。

建立「浮世志」這幾個月裡都係更新緊最近的歐洲旅程，其實想寫既還有更多更廣，在準備再次出走期間，我仍會保持更新網誌，繼續寫寫生活日常（其實還有一堆倫敦的分享未寫⋯⋯）。如果喜歡我的文章，不妨click下文章右下角的share掣，或者留個言交流下你對歐洲的印象！

xoxo.

Until next journey.

2016年7月3日星期日

歐遊後記 2016 之 Random Observations

「食」：

「住」：

「行」：

後記以後

延伸閱讀：

2 則留言:

2016年7月3日 星期日

歐遊後記 2016 之 Random Observations

「食」：

「住」：

「行」：

後記以後

延伸閱讀：

2 則留言:

2016年7月3日星期日