〔德國住宿〕慕尼黑NH德國皇帝酒店 NH München Deutscher Kaiser

珠玉在前，第二次入住NH Hotels集團的酒店就覺得有差了。

由柏林的NH Berlin Mitte （review連結）搬到慕尼黑的NH München Deutscher Kaiser，大家都係NH Hotels Group，難免有所比較。Is this bad? No. 只是柏林的NH令我有過高的期待。

由火車站出口望向酒店

Check-in： 當日落左火車過條馬路就到酒店，地點方便程度爆燈。因為抵達時已經夜晚9點，大堂好暗，我們坐左7個小時火車又已經累，而且我係facebook有見過網友post話係慕尼黑的酒店大堂checkin都可以比人搶行李，係有少少緊張，但係職員態度好友善，令我們感覺放鬆返啲。房間一早ready，我們亦好快上到房。

由呢張床開始之後我瞓的幾張床都太軟冧冧了！
腰骨痛呀陰公！

酒店房間不大，設計簡單一目了然，玄關位另有一道門可以打通隔離房變成4人房（which 我們用不著），亦有放行李的位置。床的兩邊各自有一個衣櫃，長枱上就係minibar小食，還有好多充電位，尤其床頭那個，設計值得一讚。但係！好可惜，房內係無水煲，即係無熱水⋯⋯好在我早有準備，係香港帶左一個來，有得繼續飲熱水！

非常標準的浴室

有乜感想：地點非常方便，基本上一過馬路就到慕尼黑中央火車站 Munich Hbf。食早餐可以走到火車站解決。如果想連過條馬路都慳返，可以揀Intercityhotel 城際酒店，只係評價不如NH呢間。大家都係NH Hotels旗下，有（少少）比較之下，這間NH比柏林那家便宜係可以理解的，整體不過不失，的確是一家值4/5分、唔錯的過夜酒店。

會唔會再住？這未必會係我再來慕尼黑會選住的first choice，反而如果火車站另一面的aloft有特價（又係同樣咁方便），我會毫不猶疑過對面（利申：spg gold）。

Factbox：經Hotels.com預訂，房價每晚約$700，連稅不連早餐。

慕尼黑NH德國皇帝酒店 NH München Deutscher Kaiser
地址：Arnulfstrasse 2, Munich, BY, 80335, 德國
交通方法：在慕尼黑中央火車站 Munich Hbf 人面向車站背向路軌方向，向左行2分鐘過馬路便是。

NH酒店官網： NH Hotels

延伸閱讀：

2019年再遊德國：
2019年東歐（德國、奧地利、克羅地亞）蜜月之旅．行程概覽
去慕尼黑睇拜仁慕尼黑 @安聯球場Allianz Arena
在法蘭克福的24小時

德國荷蘭12日春遊紀事2016： 行程概覽、準備篇。

慕尼黑景點：
〔慕尼黑〕達豪集中營 人間煉獄
〔慕尼黑〕新市政廳 | 地窖餐廳｜德國豬腳
〔慕尼黑〕德式生活 英國花園