浮世志: 〔飛行報告〕國泰航空 CX524/505 香港往來東京搭乘分享

終於寫到本地薑*的航空公司啦！

波音777-300 －如此難過的一程凌晨機

寫左好幾份飛行體驗，今次終於到國泰啦！過去兩三年間，其實都有搭好幾次國泰，最近這一次在今年4月時間我出差到東京，來往呢個不少香港人的「家鄉」，有budget就梗係坐返號稱Premium services的因航**啦。

為了善用時間，我都係揀左凌晨機去，晚機返。我發現好多時都會自己揀搭red eye flights，尤其long haul，好彩本人的技能之一係好容易在飛機上瞓得著，所以即使係落機直踩都無乜大問題。

Cathay Pacific － CX524 －Boeing 777-300 －HKG-NRT

搭乘日期及時間：2017年4月23日 0100 HKG - 0620 NRT（成田）

出發當日朝早收拾好行李就斯斯然在屋企hea到食完晚飯就出機場啦。又係好快咁check-in，入禁區，我又來到信用卡飯堂食魚蛋粉啦。由於閘口係31號，就去左近40號個green market。

呢次竟然唔使點排隊

是為第一餐宵夜－魚蛋粉 again

回想15年去東京玩又係飛成田，我又返黎啦～

其實次次出差都想留多一陣stay behind，但又諗多一諗，都係想留返同屋企人朋友一齊再來玩開心啲。

比我遇上最唔好坐的座位設計

根據seatguru，呢款機經濟艙座位闊18.2吋、長32吋。

最大的問題係，as you see，無得將椅背向後傾斜，你只可以向前slide，如果長途坐呢款機，真係喊出黎。

一行10個位，走廊窄到呢

Legroom少得可憐

表示好眼瞓的我係無理過個entertainment — 直接熄左個mon就瞓覺

小枕頭與毛毯

是夜第二餐宵夜 - 凍冰冰的餐盒+我的最愛VLT
呀，仲有電掣。

好快咁食完宵夜，我就準備瞓啦。話說坐在飛機左手邊的我後2行的右邊坐左一個有2個小朋友的家庭（非本地人），年紀細啲個位小朋友（我估應該得1歲幾要媽媽手抱）由起飛開始係咁喊，喊到食完宵夜都仲喊緊……真係喊左好耐，喊到我頭都有少少赤……其實我唔明除左探親，有咩事父母要帶咁細的小朋友搭飛機去咁遠旅行呢？我明一家大細去旅行可以多啲共同回憶呀嘛，不過有年紀咁細的小朋友同行的話，最好就唔好揀搭凌晨機啦，你辛苦，大家都辛苦捱眼瞓，何必呢？

而且，有什麼比在飛機上有BB喊更慘？無錯，就係兩個BB一齊喊啦！哈哈哈哈哈哈哈哈……

結果，其實我最後都係瞓著左，因為實在太眼瞓，你點喊都嘈唔醒我架啦！到我醒返，窗外個天已經光光地，準備降落成田機場啦，降落時當然好合理地BB們仍然會喊，仲加埋第3個添！

一到埗就衝出去入境啦。通常離開香港去外地，我都會揀有咁前得咁前的位，務求最快入境，一架飛機幾百人，入境櫃檯就得咁多個，走遲啲都大排長龍。

有乜感想？淨係計張櫈，已經輸左。宵夜凍冰冰，點搞？想舒服瞓一覺到目的地，真係要求好高咩？不過，作為full service carrier，overall服務都仲okay既，而且班次頻密航點多，始終都係國泰的優勢。

會唔會再搭？衝住我仲係菠蘿會友，都會既。不過盡量唔搭呢款機型囉。（點解唔揀JAL？貴兩千囉哈哈哈）

= 到左成田 =

好快都講少少機場交通呢：由於我住東京站附近，就揀左搭JR的N'EX，都係去JR的櫃檯排隊買車票，用Passport + 4,000yen就買到專比外國遊客來回機場的N'EX車票。亦好彩我早出到來，遲15分鐘已經出現人龍啦。還有時間去買個飯團做早餐，去廁所洗個臉，再去上車。FYI －京成Skyliner的櫃檯係開早上7點半。