 |
| 楊貴妃之春寒賜浴華清池 |
我們呢次黎到西安總共報了兩個一天團，經大陸的「蚂蜂窝」網站報名，但其實都係拼團交俾當地旅行社帶團。Anyway，呢類團行程好全面好方便，一早在酒店pick up我們，又包晒入場費、午餐、交通和講解，回程送到回民街，甚至包機場/高鐵接機。
旅程中的第一個團，我們先去西安最經典的旅遊路線－ 華清宮和兵馬俑，都係位於西安市外東邊的驪山。P.S. 自己去的話可以到西安火車站搭遊5(306)巴士。
一早7點半旅遊大巴就黎接我地，好彩酒店附近的早餐店勁早開，食兩個蒸包就可以出發。接客接到咁上下，就會到一個中轉站，上返自己個路線團的車。
我們是日的導遊叫小李，好快打個招呼就正式出發，旅途中都有講下歷史文化，大概一個小時就坐到去華清宮。來到門口導遊就派耳機方便聽講解，較岩channel，唔好聽錯隔離台。
 |
| 華清宮門前 |
 |
| 華清宮和後面的驪山 |
華清宮、華清池，as we all know，係楊貴妃沖涼的地方。其實當地的溫泉歷史幾千年之久，好耐之前就已經係皇室的離宮別苑、皇家園林，有山有景有故事，絕對唔止係一個靚女沖涼的地方。
 |
| 可以自費浸溫泉的地方 |
 |
| 作為皇室的離宮其實好靚，不過太多遊客 |
 |
| 五間廳 |
華清宮在近代史中亦係「西安事變」的事發地點。導遊帶我地到五間廳了解一下近史國共內戰史。
 |
| 五間廳內的浴室 |
睇完五間廳就上兵諫亭啦，呢度要自費20元電瓶車上山，你當然可以自己行上去啦，但我唔建議行囉，除非你好得閒唔係跟團。
 |
| 電瓶車 |
 |
| 兵諫亭 |
據說係蔣介石和佢老婆係大陸扮遊山玩水咁剿共啦，來到剛剛參觀過的五間廳（我又何嘗唔想旅行住白金漢宮呀）。蔣本身就唔想同共產黨一齊打日本仔，淨係想剿了共先抗日，咁梗有人唔同意呢個做法啦。在住華清宮期間，東北軍（國民軍自己友）來要捉蔣逼宮喎，一輪槍戰，受左傷的呀蔣就和守衛走上山（都唔容易架）自己匿藏係個窿度，然後好快比人發現左捉返落黎勸諫迫佢一齊抗日，就係「西安事變」啦。但係，最後二次大戰日本仔都唔係國共打嬴既，而共產黨就嬴左國共內戰啦，偉大的黨為了紀念呢件事就將呢個亭改個名，成件事真係黑色幽默。（詳情自己睇維基啦）
這裡的確景觀唔錯，仲有好多遊客，包括大媽大叔年青男女，租軍服來影相，非常愛國，估計軍人係大陸應該好受歡迎，不過香港人唔使當兵真係無乜感受。
 |
| 兵諫亭正面 |
我都有爬上去「蔣介石匿藏處」，都幾隱蔽，又難爬，我都係純粹貪玩。
 |
| 上面個窿就係「蔣介石匿藏處」 |
回到山腳就行下幾個古時候皇室用的溫泉池啦，感受一下以前啲皇帝妃子的奢侈生活。
 |
| 楊貴妃 |
溫泉池前就係楊貴妃唔著衫的雕像，造型有啲似意大利名畫 ”The Birth of Venus”。維基話楊貴妃身材豐滿，膚如凝脂，乃中國古代四大美人的「羞花」。聽返導遊解說，楊貴妃大概係160cm、120斤（大陸斤數，即係大約60kg），點睇都唔係肥呀，最多係有肉地姐，痴肥點跳「霓裳羽衣曲」？如果我穿越到唐代，都係美女呀哈哈哈。
 |
| 海棠湯，又稱貴妃池 |
入到來貴妃池，呢個時候，要念一念白居易的長恨歌啦：
回眸一笑百媚生，六宮粉黛無顏色。
春寒賜浴華清池，溫泉水滑洗凝脂。
細細個睇TVB電視劇就知道楊貴妃的故事，無錯就係2000年個一套向海嵐做主角既！不過史實係楊貴妃做貴妃得寵當年26歲，唐玄宗就60歲啦，係咪真愛呢？我就唔知啦，可能係真呢！
 |
| 其中一個泉眼 |
 |
| 另一個泉眼 |
 |
| 呢個係高官用的 |
其實現時的華清宮係有溫泉浸，比錢就得，或者附近都有溫泉酒店，不過我們就無時間啦。好多宮殿建築，還有驪山索道，我們都無去到啦，睇完幾個池出到黎開始落雨，我們亦不久留。
一天團包的午餐就係附近一間專比團客去的自助餐廳，由於好多團都會來，係「僧多粥少」的情況下，請自行努力拎野食啦。食物味道算係可以入口啦，菜多肉少，我差點以為自己係黎食齋，不過飽肚就算啦好嗎？
 |
| Lunch！ |
食完lunch就繼續行程到秦始皇兵馬俑博物館啦 － 下一篇：〔西安〕拼團一日遊．兵馬俑篇－DAY 3.2 再續。
Factbox：經螞蜂窩app報名，由於港澳台人報團和俾錢係有少少麻煩，過程一波三折，但最後都成功搞掂，而且服務好唔錯，客服有問必答，而且網上團費比西安市內旅行社（一般都要300幾人民幣，雖然都係好抵架啦）還要便宜呵呵，團費：人民幣278元，自費項目：華清宮電瓶車20元、兵馬俑電瓶車5元。
螞蜂窩連結：（店家叫章魚旅遊網 ）
特惠线路2：兵马俑+华清宫一日游（赠送午餐、耳麦、接机）
延伸閱讀：
2017年5月．七日六夜．西安遊記:
Day 1 香港往西安〔飛行報告〕、（一日團旅行社接機） ； 回民街、鐘樓Day 2 陝西歷史博物館 ； 大唐芙蓉園 ； 〔海底撈〕、大雁塔北
Day 3 【一天團】華清宮、兵諫亭、〔自助午餐〕 ； 兵馬俑、〔魏家涼皮〕
Day 4 【一天團】法門寺、〔法門寺素齋〕；乾陵、永泰公主墓、〔西安飯莊〕
Day 5 華山－西上北下：西峰＞南峰＞長空棧道＞北峰 － 玉泉院．開始夜爬
Day 6 華山－夜爬到東峰觀日台；西安明城牆；永興坊
Day 7 書院門、〔水盆羊肉〕、前往機場、西安返香港
沒有留言:
張貼留言