走壁長空驚魂道 遠看奇峰起雲湧
 |
| 在北峰仰望華山 |
西嶽華山，武俠世界，金庸筆下的「華山論劍」有邊個唔識？不過今時今日來華山係唔洗用劍既！帶錢來就得啦！作為道教名山之一，華山除了有好多文人逸事歷史故事，亦有著好多關於修道練仙的神話故事，當然仲有好多道觀啦。
從地理學出發，作為「奇險天下第一山」，其實整座山都係同一舊大花岡岩，形態氣派，以「峻、秀、奇、險」聞名於世。華山有五峰：東峰朝陽，西峰蓮花，中峰玉女，南峰落雁，北峰雲台。最高點係南峰2154.9米，最矮係1614米的北峰，有兩條纜車索道由山腳分別連接到北峰和西峰。
我們這一天行程會先搭纜車「西上北落」遊覽西、南、北峰，晚上我和朋友二人會再次進山夜爬到東峰。
由於呢篇文好長好多相，我想先show呢兩張highlights～
 |
| 小蒼龍嶺上西峰 |
 |
| 坐在長空棧道上欣賞錦鏽河山－ 其實唔難～ |
好！我地出發啦！
上午9點由酒店出發，巴士轉地鐵到西安北站，搭10點半高鐵，大約40分鐘車程到華山北站，再搭白牌車去游客中心，遊客中心內買入場票和前往西峰纜車站的巴士票，然後再搭巴士到西峰纜車站，再買纜車車票，再行10分鐘長樓梯，上到搭纜車個位，再坐30分鐘纜車吊到上山⋯⋯ Well，你終於上到華山啦！！！
 |
| 好似機場的西安北高鐵站 |
 |
| 大陸高鐵初體驗 |
 |
| 高鐵行緊接近300km/h真係令我有d淆底 |
時間關係，我地一支箭衝入遊客中心，趕係大批團客之前買入場票。
真係未上山先斬你一頸血，放血放足幾百蚊人仔。華山入場收費見最底部的remark。
 |
| 上車去西峰索道站 |
 |
| 坐左半個鐘，來到山腳 |
 |
| 左邊係可以比廿蚊人仔載你上樓梯的過山車設施 － 真係能夠搵錢的地方都會搵盡你 |
 |
| 老媽淨係呢條樓梯都行到黑晒面 |
我明點解會有過山車係隔離啦
 |
| 老媽表示已燥底 |
 |
| 未上山已行十萬級樓梯 |
 |
| 一架坐8人的西峰纜車 |
 |
| M字路線的西峰索道係真正的「又越過高山又越過谷」 |
 |
| 嗚呀呀呀呀好高呀 |
 |
| 石，全部都係石～ |
 |
| 到啦西峰 |
 |
| 佢地係西峰峭壁炸左個窿做索道站 LOL |
終於終於到啦！！
上到西峰頂的索道站大約下午1點！一上到去就感受到山上的涼意，和肚子的餓意。即刻買個熱辣辣的雞蛋餅填填肚先，盛惠15元，來到山上，百物騰貴，物資都由挑夫挑上黎，肚餓就唔好計較太多啦。好快咁食完個餅，就正式開展華山的行程了。
 |
| 小小一幅地圖 |
沿住路牌指示行，首先上西峰頂。
西峰南脊，名屈嶺，又叫小蒼龍嶺 - 行上去唔覺斜，係遠睇先覺好震撼 。
 |
| 上面睇返落黎先發現原來山脊咁窄 |
 |
| 練仙洞和翠雲宮 |
 |
| 西峰上的翠雲宮，入去再上。 |
 |
| 「劈石救母」就係呢度 |
識做生意的影相叔叔好多時已經霸左呢啲景點，等啲遊客要比錢先影到，不過如果你有大媽一樣的霸氣（我就無啦），係可以自己走上前影相走人，因為呢啲影相攤檔係do not own 個景點架！
 |
| 爬上去就係西峰頂 |
提提大家 － 一定要準備勞工手套！
 |
| 西峰2086.6米 |
 |
| btw, 華山好多貓貓 |
好快又沿小蒼龍嶺碌返去，準備上南峰！
 |
| 上南峰途中回望西峰，小蒼龍嶺真係好震撼 |
 |
| 練仙又點少得煉丹爐 |
 |
| 西嶽崢嶸何壯哉 - 李白 |
 |
| 我詞窮啦總之視野廣闊，景色壯麗啦 |
 |
| 來到最高峰 － 南峰 2154.9米！！ |
 |
| 南峰上人頭湧湧，場面好混亂 |
還有要同南峰上的「華山論劍」合照真係要識把握時機，又係要同一大班大媽大叔和影相佬爭。（其實北峰頂都有一舊）南峰己經係華山最高點，由呢度就慢慢開始落去北峰啦，中途經南天門又當然要去會一會長空棧道啦。
 |
| 南峰上又一座宮 |
 |
| 開始落山啦 |
 |
| 南天門 |
 |
| 我來啦！！！長空棧道！！ |
 |
| 懸崖勒馬呀施主！ |
長空棧道，為華山第一險道，係由幾條木板釘埋一齊、總共百餘米長的路，上下皆是懸崖絕壁，路的盡頭係一座小廟，叫賀老洞。
 |
| 排隊先！ |
相金先惠30元，租條安全帶保平安先。（溫馨提示：記得戴勞工手套）
 |
| 你條命就靠呢兩個扣啦 |
 |
| 要先落一條窄樓梯先去到棧道。 |
條路窄到呢，來回都係同一條路，正所謂「狹路相逢」，長期塞人。最慘係我已經著好左安全帶，企左係落棧道條崖壁樓梯等左半個鐘先可以落到去。無錯，條樓梯只係幾十條不鏽鋼條插入崖壁架咋，要好好捉實條鐵鏈，所以勞工手套好重要，可以避免凍親對手同成手鐵鏽味。
 |
| 我等左半個鐘啦，好凍好大風呀 |
由於已經比左錢無得返轉頭，吹左咁耐風手都凍僵嬲嬲地就決定影左張景點過膠相留念先，50大元！
 |
| 我都覺得自己好勇，比50蚊影左呢張相～哈哈哈 |
 |
| 由於來回都係呢條路，通常呢你去程係走入面，回程就要讓人地走內線，自己走外面既。 |
結果用了1小時才完成棧道。
出返南天門就繼續落山啦。當初誤以為北峰索道收下午6點，急急腳由南天門趕落去北峰，搞到時間上有少少緊張。我們沿住指示落山，其實走的都已經係比較容易和好走的樓梯，並非經最經典的登山徑「自古華山一條路」（稍後夜爬才是走這條），所以體力唔算消耗得多。
 |
| 金鎖關 |
 |
| 一堆堆鎖 － 有興趣就買個來扣啦 |
 |
| 老媽來到擦耳崖 |
娘親以為華山係好似張家界咁山上會有電瓶車，完全當我兩三個月前叫佢訓練體能係耳邊風，實在太天真了。結果，作為孝子的我幫娘親揹背包，佢一路落到擦耳崖就係度尷尬笑。（有趣的是，返到香港問返娘親，整個西安行程中佢最鐘意的景點竟然都係最辛苦的華山，鐘意行山夠chur喎，可能因為好有成就感啦～）
 |
| 快到北峰了！ |
所謂「上山容易落山難」，經過1.5小時向下衝，腳都軟，終於見到索道站啦！如果屬於體力差，建議都係西上西下啦。
 |
| 趁有時間上北峰 |
點知原來索道旺季收7點，還有時間比我地登北峰頂影相。
 |
| 北峰望西峰 |
 |
| 1614.7米＠北峰 |
 |
| 北峰呢舊仲要大舊啲 |
唔通我識獨孤九劍又話你知咩？
 |
| 走啦 |
全華山景區有200幾個景點，散佈山上山下，想來多走幾個景點，最好就再早啲出發來啦～
 |
| 北峰索道短好多，十幾分鐘就落返去 |
 |
| 北峰索道山腳站亦係「智取華山路」的登山入口 |
來大陸旅行真係唔好以為會比去日韓台便宜，大陸景點的門票真係好貴好貴好貴，尤其旺季，淨係華山兩個人都使左過千在門票和來回交通上。
華山景區旺季收費（成人價）：華山入場費180元、保險10元、遊客中心到西峰索道站巴士費40元、西峰索道單程120元、北峰索道單程80元、北峰索道站回遊客中心巴士20元，坐底就已經450元啦。
再加上西安-華山的交通：西安北-華山北高鐵每人單程54.5元，華山北到遊客中心白牌車/的士公價20元一程。仲未計飲食啦、紀念品啦、自費去長空棧道啦，去一次華山，每人要預備至少600元人民幣先得。
遊覽華山所需裝備（非爬山）：（font size=100）錢（/font size=100）、勞工手套、水、小食（if 你唔想在上面買食物）、防風保暖薄外套、濕紙巾（in case你想去廁所無水洗手）
華山之旅還未完架，對我地來講呢一刻先係岩岩開始，因為我地會夜爬華山，登東峰觀日出。
延伸閱讀：
沒有留言:
張貼留言