〔西安〕明朝城牆縱橫行 － Day 6.2

I travel on city wall by car - 逍遙遊走中國現存規模最大，保存最完整的古代城牆。

明城牆南門

來到Day 6，完成左本人人生創舉之一的夜爬華山，睇完個日出回到西安，整個人頹晒。整整30小時無瞓覺，完全無心機搵野食，結果買左個杯麵返房食，拿拿臨食完沖個靚涼，然後瞓返兩三個鐘休息下。

補眠完就又繼續行程，搭巴士去到西安城牆的南門入口，下午5點幾的西安仍然好熱，我個樣仍然好殘，不過無損我們來到西安明城牆參觀的興緻。

南門

又係相金先惠 － 城牆入場費54元。

過橋

護城河

一入到去，就覺得城牆好有氣勢，好宏偉震撼～

以前的明城牆真係得東南西北四道門，圍住整個長安城，現時見到的眾多出入口，例如我地酒店附近的和平門，就係後來見人多車多為了疏導交通而打通的。

我地由南門進入城牆，據我地其中一位一日團導遊話，南門係由古至今接待外賓的入口，所有重要的使節都會由南門入西安市內，我地咁重要梗係都由南門上啦（大言不慚）。南門的夜景亦係西安三大夜景之一，可惜時間關係我地只係睇左另外兩大夜景 — 鐘樓和大雁塔北音樂噴泉。

入去個時咁岩有幾對情侶係度影pre-wedding，準新娘子係著大紅袍古代禮服再加個鳳冠，好似女王咁，配埋西安城牆的氣勢，嘩嘩嘩好型。而著紅色西裝的新郎，well，就成為左路人甲啦，不過唔緊要啦影婚紗相男人不嬲都唔係重點啦係咪？

我們繼續行入去，沿幾十級樓梯行上城樓，真係…攞命。

城牆上的城樓

根據維基百科，西安城牆自明朝初年在唐長安城皇城的基礎上建造起來，後來又經過多次修補，形成嚴密的防禦體系，是中國現存最完整的古城牆之一，與平遙城牆、湖北荊州城牆、遼寧興城城牆等並列為中國現存最完好的四座古城牆，也是規模最大的古城牆之一（最大為南京城牆），周長13.74公里，城牆周圍有護城河環繞，是中世紀後期最著名的城垣建築之一。

上到來視野廣闊，城牆其實真係好厚，上面可以揸私家車的話至少可以開兩三條行車線，當然，私家車梗係唔比上，就只有偉大（！）的電瓶車。

城牆好厚，上面的路好闊

維基又有提到，文革個時，紅衛兵破壞了不少文物，例如北京的城牆和長城佢地都拆左唔少，其實佢地有意拆埋西安城牆架，不過城牆太厚太宏大，佢地無人力物力就拆唔到啦！（笑）如果《魔戒》入面啲城市都有咁既城牆，就唔使驚半獸人啦！

城牆內的平房

以前啲西安人拿了城牆磚起屋，後來要修復城牆就叫人捐返出來仲可以刻個大名

城牆全長13點幾公里，踩單車都要兩個小時，我們又點會就咁步行呢？電瓶車服務會在西安城牆上繞城一圈，仲有在東南西門都有分站服務，睇你坐幾多個站就俾幾多錢，逐個站計30元，完整繞一圈就係120元啦。上落車和售票處都係租單車+禮品店隔離。

要注意，電瓶車係有分東行和西行，而且唔同上落車點，南門城樓左右兩邊就分別係東行和西行的上車點，要問清楚電瓶車係行邊個方面先好買票。

我地呢班知慳識儉的精明港女，就決定搭3個站，繞個四分三圈，由南門往西走，坐到東門就夠啦。之後可以行去本地人勁推介的永興坊食晚飯。

就係咁，我地出發啦。司機大哥偶然都會介紹附近的景點，中途仲會停低方便你影相，去到西門、北門當然亦有給予充足時間影城樓。仲有日落添！

一路向西（堅係向西邊行）

咁寬廣的城牆好適合影下合照

城牆角樓

我記得司機話，西安城牆的幾個角其實係圓的，唔係sharp 90度角，因為想避免形成一個「口」字入面住了人就變成「囚」字啦。

我們尊貴的座駕

日落

我都分唔出邊個城門打邊個城樓啦~

我們坐完電瓶車就已經7點幾啦，即係坐車都坐左接近一個小時，可見90大元其實好抵俾。如果叫我行，我應該崩潰左……行完城牆，就由東門離開步行到永興坊啦。

東門出口

最多可以入11萬人！

西安城牆
入場費：54元人民幣
開放時間：南門8am-10pm，其他門8am-6, 7pm 不等
建議遊覽時間：起碼2-3小時
建議遊覽方法：單車或電瓶車


旅遊日期：2017年5月25日

延伸閱讀：

2017年5月．七日六夜．西安遊記:

Day 1 香港往西安〔飛行報告〕、（一日團旅行社接機） ； 回民街、鐘樓
Day 2 陝西歷史博物館 ； 大唐芙蓉園 ； 〔海底撈〕、大雁塔北
Day 3 【一天團】華清宮、兵諫亭、〔自助午餐〕 ； 兵馬俑、〔魏家涼皮〕
Day 4 【一天團】法門寺、〔法門寺素齋〕；乾陵、永泰公主墓、〔西安飯莊〕
Day 5 華山－西上北下：西峰＞南峰＞長空棧道＞北峰 － 玉泉院．開始夜爬
Day 6 華山－夜爬到東峰觀日台；西安明城牆；永興坊
Day 7 書院門、〔水盆羊肉〕、前往機場、西安返香港

Facebook: @浮世志 Ukiyozhi
Instagram: @ukiyozhi
Email: ukiyozhi@gmail.com