夜爬千尺上華山 日出東峰朝陽顯
 |
| 華山百尺峽 |
上華山，論英雄！計劃去西安的時候，好偶然睇到一篇夜爬華山的遊記，好熱血好想挑戰自己，就有了夜爬華山睇日出的想法。有些東西你現在不做，可能這輩子都不會做，夜爬華山就係一例。
WARNING：呢條唔係新假期乜假期推介的輕鬆郊遊路線，真心高難度、真心講體能，如果你係香港都唔係做開運動行開山，我勸你都係搭纜車啦。行山最緊要量力而為！
「自古華山一條路」－ 係登華山最傳統的路徑，係古時已經開闢、八十年代再修繕的上山路，登山客由玉泉院華山門出發，經千尺幢、百尺峡等著名景點，先登上最矮的北峰經蒼龍嶺再上金鎖關到東峰。
整條上山路線由玉泉院開始上到東峰觀日台全長約9公里，爬升1,600米，還未計回程落山喎！部分路段接近90度斜度需要拉住鐵鏈爬上去，比蚺蛇尖再要斜還要長，而且除非你原路折返或者行得到1,600米的北峰搭纜車，中途是無退出點的。如果你有志好似我地咁沿「自古華山一條路」攀登華山，建議你行返幾次蚺蛇尖八仙嶺，練一練體能先好上。
*另一條路為「智取華山路」，由解放軍建造，起點為北峰索道山腳站出發，長度比較短亦較少景點，無補給站。
 |
| 夜爬蒼龍嶺 |
完成了
Day 5 日間行華山西上北下的行程，我和我朋友就將兩位母親大人安頓到在玉泉院預約好的住宿，再到隔離餐廳食個晚飯，好簡單咁食個炒飯，飲碗湯，休息一會。住宿樓下就係超市，我地買左乾糧、水和頭燈（但其實頭燈係無用過），晚上9點半準時出發。
 |
| 出發啦！ |
繞過玉泉院靠右行/沿街小店行就會搵到一條斜路入口，由此路登華山。是夜天氣晴朗無乜雲，9:30pm山下氣溫23度，根據每上1,000米低10度的理論，山上即係大約10-13度。
 |
| 出發時已經有好多人伴著，其實好熱鬧！ |
 |
| 華山門 - 中間兩個影就係我和我個fd LOL |
在呢一刻，我地還是幾精神！
 |
| 經過五龍橋 |
 |
| 廿四小時營業的售票處 |
到了檢票門，我們用返日間的票加上核對手指模，就可以二次進山。網上有帖話不可以二次進山，係錯的哦，我地就係成功的例子，華山的門票時效48小時。
 |
| 沿斜路輕鬆上 |
 |
| 沿途有好多補給站 |
行了1小時，到了第一關。
 |
| 第一關 |
 |
| 五里關，主要係要睇睇地圖 |
五里關距離東峰還有7公里，6,600幾級樓梯⋯⋯哈哈哈⋯⋯
 |
| 莎蘿坪 |
經過莎蘿坪就又休息一下，玩下貓。到目前為止都還是斜路，但愈來愈斜啦。
 |
| 華山真係好多貓，隻隻都肥肥白白！ |
我們無停留太耐，因為一停就開始覺得凍。
 |
| 再上少少，我頂唔順啦我要食野！！！ |
臨上樓梯前，來到呢度，我要買條青瓜咬啦，10元3條。連皮青瓜咬到一半，味道有點澀，我原先以為係我揀得唔好的問題，呀媽後尾教返我原來青瓜要磨一磨先唔會澀，唔怪得之個時食落咁澀口啦！
 |
| 仙姑橋 - 其實黑麻麻睇唔到啲乜 |
 |
| 穿過第唔知幾多道山門 |
之後就繼續一路咬一路上啦，由呢度開始 － 全部都係樓梯，一直上到東峰都係樓梯、樓梯、樓梯。咬青瓜除了可以補充水份和營養（熱量就無乜啦），個口有啲野嚼下嚼下係會無咁眼瞓，原來非常有用。
 |
| 又經過一個補給站啦 |
途經補給站啲老闆個個都會話自己係最平，最後一站呢口價，又會話仲有排未天光，依家上去會太早了，千祈唔好聽佢地亂吹，有需要就買，上山就要繼續上，因為只會愈行愈慢，根本好難預幾時去到山頂。
 |
| 又一道山門 |
 |
| 應該係景點，but wfc? |
 |
| 戲肉來啦！！ |
上完呢條樓梯就係大名鼎鼎的「千尺幢」。
 |
| 千尺幢、百尺峡都安裝了會變色的路燈 |
戴好勞工手套，拉著兩旁鐵鏈就上啦！嗚呀！
 |
| 上啦！ |
 |
| 紅色的話會唔會太似road to hell？ |
千尺幢和百尺峡之間有個平台，平台上有間小店，雖然我地只係在此小休無光顧，但都好佩服老闆係呢個位開店，高處不勝寒，店內放著一箱箱水、紅牛和杯麵，個人就唔建議飲紅牛，刺激性好高，我驚心臟負荷不來。
 |
| 百尺峽 |
 |
| 可以睇到有幾斜 |
 |
| 百尺峽個頂係一舊大大舊的驚心石，穿過就叫平心石 |
當你以為千尺幢、百尺峡已經夠難爬？老君犁溝先攞你命，一樣咁斜但還要長好多，傳說太上老君過此處，見無路可通，就牽來青牛一夜間犁成這條山溝。至今在西側的崖上仍有石溝赫然若犁槽。哈哈哈何不起扶手電梯呢？
 |
| 老君犁溝 |
 |
| 在老君犁溝selfie一張 |
由於條路好斜，千尺幢、百尺峡、老君犁溝，基本上你係拉住鐵鏈爬上去。
到了老君犁溝頂就好快到北峰紀念亭，見到「軍魂」呢塊碑，我就真係感覺到我的靈魂燃燒緊，就黎變軍魂。北峰紀念亭呢片小小的平地上亦有好多人休息緊，有啲應該係租左個帳篷休息。
 |
| 嗚呀「軍魂」！ |
上到北峰，行左4小時多少少，其實都仲係預期之內。夜爬最困難的地方不在於體力足不足，而係眼瞓＋寒冷＋疲勞，三樣加埋才是最難應付，一不留神叉錯腳就係咁先。由北峰休息了一會兒就繼續上啦。
 |
| 到蒼龍嶺啦！ |
 |
| 日間行過小蒼龍嶺，可以想像真正的蒼龍嶺有幾驚險 |
夜晚爬蒼龍嶺就有好有唔好，好就係睇唔到幾高幾危險就會專心爬上去，唔好就係睇唔到幾高幾危險 （笑）。如果在日間望向蒼龍嶺，應該係會見到兩邊係懸崖峭壁，沿山脊而上一條窄窄的樓梯，一般只係會比人往上行；如果遊人係由上面行落來北峰，乖乖跟指示走的話應該會係走了另一條新建、無咁窄、無咁斜的靚靚樓梯路。
 |
| 驀然回首，北峰就在燈火闌珊處。 |
經擦耳崖、蒼龍嶺上到金鎖關明明得1.5公里，但我們行了足足2小時，行極都未到，每一次轉彎以為柳暗花明快到了，誰知一次次希望，一次次絕望，還要睇住大媽都行得快過自己，真係慚愧……行了幾個鐘頭，整個人好熱，但流出黎的汗係凍，加上眼瞓，只能係靠意志繼續上。
 |
| 是日日出係5:30am！ |
還未到金鎖關，就發現自己好似已經behind schedule，花了比預期多的時間。我有一刻以為我地真係會爬唔切上東峰，不過我地同自己講總之日出之前爬得幾多得幾多。好似大長今咁講，「無人可以教我放棄！」
到左金鎖關個時我感到好感動，感動到要即刻買條熱辣辣的烤香腸獎勵自己，嗚呀成嘴都係油，好香好幸福。
 |
| 金鎖關 |
剩下來的路只有幾百米，不用一個小時就可以上東峰。
 |
| 觀日台上一片攤屍 |
 |
| 我到東峰啦啦啦啦！！ |
2017年5月25日凌晨4點33分，我地終於到左華山東峰觀日台啦！真係喊出黎！來到呢度已經有好多人霸定靚位睇日出，還有更多人已經好似攤屍咁攤左係度，我地在觀日台個看台上搵左個位坐低休息，將帶來的外套全部著晒上身保暖。
點知坐唔夠10分鐘，啲人就開始企返起身，因為東邊的天空剛剛開始見到光，啲人就起鬨，我真係想講粗口。呢一刻距離日出還有45分鐘。
 |
| 有少少光就已經要企起身 |
我本來想堅持坐多陣，但四周的人都企左起身，為了我人身安全避免人踩人，我都係企返起身。見過南極企鵝圍爐取暖未？我們和周圍的登山客就好似企鵝咁痴埋一齊企到日出，足足企左一整個小時。
由於前面都有人，我都係睄左兩眼日出，同時用腳架叉住電話影相（又係我柒左我應該拎自拍棍而唔係拎三腳架，根本無位擺）。
 |
| 南極企鵝圍爐取暖等日出 |
 |
| 出來啦太陽！ |
感動。無限感動。我唔知講乜好。
望住旭日初升，突然明白，我征服的不是華山，而是自己。
 |
| 媽呀我用了7小時燃燒青春換來的大大個日出！ |
感動完就要返回現實啦。我和朋友在觀日台的人山人海中浮沈了一會，凍到打冷震，心入面都好清楚以自己的體能是無可能行多兩小時落返北峰，所以決定經中峰取西峰索道離開。我見不少人繼續上南峰，表示心感佩服。其實計返我們前一日日間的路程（西峰上南峰再落北峰），已經算係目標達成架啦。
 |
| 東峰條雲梯，日出先影返相 |
 |
| 中峰 |
 |
| 中峰通去西峰的路 |
西峰索道開早上7點，我們看完日出6點就來到售票處。不少人已經開始排隊，但我倆實在太累，就坐在售票處旁的樓梯上抱住腿就瞓著左，瞓到開門先去排隊買票下山。
 |
| 西峰索道未開門 |
 |
| 等買票 |
 |
| 終於落山啦拜拜啦！ |
自己睇返啲自拍照，before & after，證明了年紀大左捱夜真係唔掂啦。由於已經係二次入山，老實講體能並非係最好的狀態，好在都足夠應付上山路程，我們一共用左7個小時由海拔400幾米的玉泉院爬升到2,100米的東峰，正常呢應該4小時到北峰、再加2小時上東峰，總共6個小時。
總之總之，再提一次，行山最緊要係量力而為，不要勉強，有需要就多休息休息啦～
點解會諗到要夜爬華山係因為睇左一篇螞蜂窩遊記：
终到华山——夜爬团15小时爬上爬下的如梦旅程,华山自助游攻略- 蚂蜂窝，睇到好熱血，我都想趁年輕熱血一次。
裝備方面，大家可以參考上面的遊記，而以本人經驗，最重要、最重要、最重要的裝備係：
- （font size=100）錢！！（/font size=100）因為錢除左唔能夠補充你本身的體力，係可以解決所有以下的問題。
- 防風保暖大衣 － 最好係羽絨或者衝峰衣，即係防風防水行山三合一運動外套（唔明就淘寶search下啦），其實係必要既，即使係夏天都係，再唔係就山腳玉泉院比廿幾三十蚊租一件，山上租大衣就50元一件，我著左羽絨背心和幾件長袖衫外套都係唔夠暖，只係好勉強唔會凍親。根據每上1,000米低10度的理論，山頂2,100米，得大約攝氏10度，加上大風，又累，保暖變得尤其重要。
- 勞工手套－ 拉鐵鏈防鐵鏽味
- 水 － 2L夠啦，唔夠就買啦～最好帶埋熱水。
- 小食 － 帶定啲energy bar/power gel，高熱量的食物，唔夠可以買～
- 衣著 － 普通運動衫長褲運動鞋就可以（港女Sportsbra都係keep返係件衫入面啦）
- 雨衣 － just in case
Factbox：
華山景區旺季收費（成人價）：華山入場費180元、保險10元、遊客中心到西峰索道站巴士費單程40元、西峰索道單程120元、北峰索道單程80元、北峰索道站回遊客中心巴士單程20元。再加上西安-華山的交通：西安北站至華山北站高鐵每人單程54.5元，華山北到遊客中心白牌車/的士20元一程。
離開華山個時都係搭高鐵走，想快點返到酒店洗洗睡，不過另有選擇可以係玉泉院直接搭大巴返西安，應該車程需時約2小時，但係車費我就不太清楚啦。
沒有留言:
張貼留言